#Ethiopia🌱🇪🇹#GreenLegacy

#Ethiopia🌱🇪🇹#GreenLegacy

" ዛፍ ለዛሬ ትርጉም የለውም ለነገ ግን ትርጉሙ ብዙ ነው። ምግብ ነው፣ ጥላ ነው፣ ውበት ነው፣ ከዚያም ባሻገር የሚሸረሸር የሚጠፋ ሃብታችንን የሚጠብቅ ዘብ ነው " - ጠ/ሚ ዐቢይ አሕመድ (ዶ/ር)

በአንድ ጀምበር ከ800 ሚሊዮን በላይ ችግኞችን የመትከል የአረንጓዴ አሻራ መርሃ ግብር " ተስፋን እንትከል " በሚል ከማለዳው ጀምሮ እየተካሄደ ይገኛል።

እስካሁን ባለው 200 ሚሊዮን ችግኞች በመላ ሀገሪቱ መተከላቸው ተገልጿል።

የኢፌዴሪ ጠ/ሚ ዐቢይ አሕመድ (ዶ/ር) በመደመር ኤ አይ ዩኒቨርሲቲ አሻራቸውን ያሳረፉ ሲሆን ዜጎች በዚህ ኢትዮጵያን በማልበስ ንቅናቄ ውስጥ ንቁ ተሳትፎ እንዲያደርጉ ጥሪ አቅርበዋል።

ጠቅላይ ሚኒስትሩ፥ " ባለፉት 7 አመታት በተከታታይ ሳይቋረጥ ክረምቱን በሙሉ ኢትዮጵያን ለማልበስ ፣ የኢትዮጵያን መሰረት ለመጣል መላው የኢትዮጵያ ህዝብ ከፍተኛ ጥረት ሲያደርግ ቆይቷል " ብለዋል።

" የጥረቱ ዋነኛ አላማ ኢትዮጵያ መበልፀግ አለባት፣ መብላት አለባት፣ መለወጥ አለባት፣ ማደግ አለባት ፣ መሰልጠን የሚል የኢትዮጵያውያን ምኞት ፣ ህልም ፣ መሻት " እንደሆነ አመልክተዋል።

" አሁን እየሰራን ያለነው ለልጆቻችን ነው " ያሉት ጠቅላይ ሚኒስትሩ " ተስፋ ነው የምንተክለው ፤ ነገን ነው የምንተክለው ፤ ኢትዮጵያን ነው የምናለብሰው ይሄ ደግሞ የሚሆነው በትብብር ነው መላው የኢትዮጵያ ህዝብ ወጥቶ በሚያደርገው ጥረት ነው " ብለዋል።

እየተሰራ ያለው ኢትዮጵያን አረንጓዴ የማልበስ ስራ አሁን ላይ ከኢትዮጵያ አልፎ ሌሎችም ኢትዮጵያን የመከተል ጥረት ውስጥ እንዲገቡ ማድረጉን ገልጸዋል።

ኢትዮጵያ ላለፉት ዓመታት ላደረገችው ጥረት የዓለም መንግስታት እውቅና ፣ ሽልማት ሰጥተው ኮፕ በኢትዮጵያ እንዲዘጋጅ እንደወሰኑ ጠ/ሚ ዐቢይ (ዶ/ር) ተናግረዋል።

" ኮፕ ማለት በዓለም ኢንቫይሮመንትን በሚመለከት በጣም ትልቁ ስብሰባ የሚካሄድበት ነው። ከ80 ሺህ እስከ 100 ሺህ ሰው የሚሳተፍበት ቢያንስ እስከ 100 መሪዎች የሚሳተፉበት ነው። እንደዚህ አይነቱን ትልቅ በዓል ኢትዮጵያ አዘጋጅታ አታውቅም። ከሳሃራ በታች ያሉ ሀገራት አዘጋጀተው አያውቁም " ብለዋል።

ይህን ግዙፍ ዓለም አቀፍ ስብሰባ ኢትዮጵያ ማዘጋጀቷ ትልቅ ብስራት የሚሆነው " ዓለም የለበሰች፣ ያማረች ፣ እያደረገች ያለች ፣ ተስፋ ያላት ኢትዮጵያን ፣ ህልም ያላት ኢትዮጵያን ከብዙ ንግግር በላይ ገልጠን ለማሳየት የኛን ተጨባጭ ልምድ ለማካፈል ትልቅ መድረክ ስለመሆን ነው " ሲሉ ገልጸዋል።

" እኛ ኮፕን አስታከን አመቱን ሙሉ ኢትዮጵያን እንገነባለን፤ እንተክላለን፣ እናጸዳለን፣ እናፈርሳለን፣ እንገነባለን፣ ኢትዮጵያን እየገነባን ምክንያት አድርገን በመጠቀም ለዓለም የተባበረ ህዝብ መሰረት መጣል፣ ሀገር መገንባት እንደሚችል ጥሩ ማሳያ ይሆናል " ብለዋል።

ጠ/ሚ ዐቢይ አሕመድ (ዶ/ር) ፤ " ይህንን ጉዳይ ስንሰራ ለልጆቻችን አንድ ማስታወሻ እየተውን፣ ለልጆቻችን አንድ ቁምነገር እያስቀመጥን፣ ቅርስ እያስቀመጥን እንደሆነ እያሰብን እንስራ። ዛፍ ለዛሬ ትርጉም የለውም ለነገ ግን ትርጉሙ ብዙ ነው። ምግብ ነው፣ ጥላ ነው፣ ውበት ነው፣ ከዚያም ባሻገር የሚሸረሸር የሚጠፋ ሃብታችንን የሚጠብቅ ዘብ ነው " ሲሉ ተናግረዋል።

" ዛፍ መትከል ብዙ ትርጉም ስለለው ኢትዮጵያውያን በጀመርነው መንገድ ተባብረን ዛሬም፣ በሚቀጥሉት ሳምንታትም በመትከል የዚህ ዓመት ግብ ማሳካት የዕለቱን ግብ ማሳካት ዋነኛ ስራችን ይሁን " ሲሉ መልዕክት አስተላልፈዋል።

ዛሬ 800 ሚሊዮን ችግኝ ለመትከል ኢትዮጵያውን ከጥዋት ጀምኦ እየተረባረቡ መሆኑን አመልክተው " ደጋግመን በመትከል ያልነውን ቃል እንደምንፈጽም ሙሉ እምነት አለኝ፤ በርቱ ተስፋን ትከሉ " ብለዋል።

ቲክቫህ ኢትዮጵያ
አዲስ አበባ
ሃምሌ 27 ቀን 2018 ዓ/ም

@tikvahethiopia